Jetët e miliona ukrainasve janë në rrezik, pas dëmtimeve kolosale të rrjetit elektrik!
OBSH deklaron se jetët e miliona ukrainasve janë në rrezik në dimër.
Qeveria ukrainase po përgatit plane për të evakuuar rajonet Kherson dhe Nikolaev, rrjetet e ngrohjes dhe të energjisë elektrike të të cilave janë dëmtuar rëndë nga bombardimet ruse.
Operatori i rrjetit kombëtar të energjisë elektrike të Ukrainës tha sot se dëmi i shkaktuar në termocentralet e Ukrainës nga sulmet me raketa ruse ishte “kolosal”.
Në të njëjtën kohë, ai hodhi poshtë mundësinë e largimit të qytetarëve nga qytetet, diçka që autoritetet ukrainase po planifikojnë tashmë për Kherson dhe Nikolaev.
Volodimir Kudritskji, shefi ekzekutiv i Ukrenergo, tha gjatë një konference se ukrainasit mund të përballen me ndërprerje afatgjata të energjisë, por se operatori i rrjetit dëshiron të ndihmojë në krijimin e kushteve që njerëzit të qëndrojnë në vend gjatë dimrit. Pothuajse asnjë termocentral apo hidrocentral nuk është kursyer nga sulmet ruse, tha ai.
“Në Ukrainë ka një deficit të prodhimit të energjisë. Ne nuk mund të prodhojmë aq energji sa mund të përdorin konsumatorët”, tha Kudritskji.
I pyetur në lidhje me propozimet e disa zyrtarëve për të evakuuar qytetarët nga qytetet më të goditura nga mungesa e energjisë, ai tha se thirrje të tilla ishin “të papërshtatshme”.
Evakuimi i Kherson dhe Nikolaev.
Qeveria ukrainase po shqyrton evakuimin e rajoneve Kherson dhe Nikolaev, të cilat po përjetojnë probleme me energjinë elektrike dhe ngrohjen, pasi frika e një krize humanitare intensifikohet me afrimin e dimrit, thanë zyrtarët, sipas New York Times.
Ndërsa bombardimet ruse të infrastrukturës jetike vazhdojnë, zyrtarët ukrainas po kërkojnë mënyra për të ndihmuar qytetarët të kalojnë dimrin, edhe pse marrja e nevojave themelore mund të bëhet një luftë për mbijetesë.
Në Kherson, autoritetet ukrainase thonë se për shumë banorë, zgjidhja e vetme është largimi.
Me furnizimet me ujë të rrjedhshëm, ngrohje dhe energji elektrike në mungesë në këto qytete, zëvendëskryeministrja e Ukrainës Irina Vereshchuk tha se në ditët në vijim qeveria do të fillojë të ndihmojë ata që dëshirojnë të largohen. Por ajo theksoi se banorët do të vendosin vetë se çfarë duan të bëjnë.
“Për momentin nuk po flasim për evakuim të detyruar”, tha ajo.
“Por edhe në rast evakuimi vullnetar, shteti është përgjegjës për transportin. Njerëzit duhet të çohen diku për të kaluar dimrin.”
Megjithatë, në Nikolaev, rreth 40 milje në veriperëndim të Khersonit, Irina Vereschuk tha se, “qeveria do të ndihmojë gjithashtu banorët të largohen. Nikolaev është një objektiv i shpeshtë i raketave ruse dhe banorët e të dy qyteteve kanë kërkuar që të zhvendosen në zona më të sigurta”.
Shumë nga njerëzit që jetojnë në zonë janë të moshuar ose të paaftë.
Ka dëme “kolosale” në objektet energjetike të Ukrainës, praktikisht nuk ka mbetur asnjë termocentral dhe hidrocentral në vend.
Kjo u njoftua në një konferencë më 22 nëntor nga kreu i bordit të kompanisë kombëtare të energjisë (NEC) Ukrenergo Volodimir Kudritskji.
Gjithashtu, nuk ka mbetur pothuajse asnjë nënstacion i paprekur.
“Zor se kemi ndonjë termocentral dhe hidrocentral që nuk është dëmtuar ndjeshëm gjatë bombardimeve. Çdo nënstacion i madh është goditur, disa prej tyre shumë herë, 3, 5 madje 8 herë”, tha Kudritskji, duke shtuar se, “objektet e energjisë ukrainase nuk mund të prodhojnë sasinë e energjisë që u nevojitet konsumatorëve”.
Mbingarkesa e rrjetit në Kiev: Shpërtheu nënstacioni elektrik!
Karakteristikë e situatës është se në Kiev një natë më parë ka rënë zjarr i madh në një nënstacion elektrik.
Ky nuk ishte rezultat i një sulmi raketor, por rezultat i një mbingarkese kritike të rrjetit.
Me fillimin e të ftohtit, kur ukrainasit fillojnë të përdorin ngrohje elektrike, trupat e ngrohjes sjellin si rezultat që rrjeti tani të jetë i mbingarkuar.
Sipas Ukrenergo, sot, si dje, nga ora 00.00 deri në orën 24.00 do të ketë ndërprerje “të planifikuara” të energjisë në të gjitha rajonet e Ukrainës.
Kreu i kompanisë ukrainase të energjisë YASNO, Serhij Kovalenko, tha se ndërprerjet do të zgjasin të paktën deri në fund të marsit 2023, nëse Rusia nuk do të godasë më objektivat e energjisë.
