Sulmi i Erdoganit kundër Netaniahut dhe goditjet kundër SHBA.
Rexhep Tajip Erdogan duket se anuloi udhëtimin e tij të planifikuar për në SHBA më 9 maj dhe takimin me presidentin amerikan Joe Biden, siç raporton Bloomberg.
Sipas Bloomberg, duke cituar një zyrtar të njohur me këtë çështje, udhëtimi do të vonohet “për shkak të një ndryshimi në programin e Erdoganit”.
Deri më tani, pala turke e kishte konfirmuar prej ditësh udhëtimin e planifikuar të presidentit turk, por nga Shtëpia e Bardhë nuk kishte asnjë informacion zyrtar.
Më herët gjatë ditës së premtes, duke folur në një aktivitet në Stamboll, presidenti turk nisi një sulm të drejtpërdrejtë ndaj kryeministrit izraelit Benjamin Netaniahu lidhur me luftën në Gaza dhe sulmoi SHBA-në për mbështetjen e saj ndaj Izraelit.
“Hitlerët dhe nazistët e sotëm janë vrasës që vranë më shumë se 15.000 fëmijë në Gaza. Netaniahu, ashtu si vrasësit para tij, e ka shkruar si famëkeq emrin e tij në histori, si kasapi i Gazës. kjo njollë e zezë e ngulur në ballin e tij nuk do t’i hiqet, pavarësisht se çfarë mund të bëjë”, përsëriti Erdogan.
“Paraardhësit e mi i shërbyen Jeruzalemit për 400 vjet. Trashëgimia e tyre nuk mund të fshihet”, theksoi ai.
“Mbështetja e pakushtëzuar ushtarake dhe diplomatike për Izraelin nuk kontribuon në zgjidhje, por e përkeqëson problemin”, tha Erdogan për SHBA-në dhe veton e saj ndaj një rezolute të Këshillit të Sigurimit të OKB-së për çështjen palestineze.
“Ndërsa 35 mijë njerëz u vranë brutalisht në Gaza, miratimi nga Senati amerikan i paketës së ndihmës ushtarake prej 25 miliardë dollarësh për Izraelin është treguesi më i qartë i kësaj. Ne hedhim poshtë politikat hipokrite të vendeve perëndimore për çështjen palestineze, të cilat tani po na bëjnë të humbasim durimin tonë”, tha ai.
“Vetoja e SHBA-së ka treguar edhe një herë sesa e saktë është deklarata jonë se bota e madhe është e të pestëve. Nuk është e mundur të vazhdohet me strukturën aktuale që ia lë fatin e gjithë njerëzimit tekave të 5 vendeve”.
