Vendi më i nxehtë në Tokë dhe një nga vendet më të pafavorshme në planet është mbushur me lule shumëngjyrëshe. Në Luginën e Vdekjes në Kaliforni, SHBA, lulet e egra çelën për shkak të reshjeve të dendura tre muajt e fundit.
Lugina e Vdekjes, e cila shtrihet kryesisht në Kalifornian juglindore, është një depresion tektonik që filloi të formohej 30 milion vite më parë, me fundosjen e një pllake të madhe tektonike dhe ngritjen pasuese të pllakave tektonike fqinje. Kjo rezultoi në krijimin e vargmaleve dhe një peizazh jashtëzakonisht të thatë dhe pa bimësi.
Lugina është unike, pasi pjesa më e madhe e saj është nën nivelin e detit, me pellgun Badwater që është lartësia më e ulët në të gjithë Amerikën e Veriut. Është 86 metra nën nivelin e detit. Shtresa shkëmbore e luginës qendrore është varrosur nën mijëra metra sedimente të gërryera nga lartësitë më të larta.
Me male në të dyja anët, pothuajse të gjitha reshjet janë të bllokuara, duke e bërë Luginën e Vdekjes rajonin më të thatë dhe më të nxehtë në Amerikën e Veriut.
Parku Kombëtar i Luginës së Vdekjes tërheq gati një milion vizitorë çdo vit. Me reshje mesatare vjetore prej më pak se 2 inç (5 cm), Lugina e Vdekjes klasifikohet si shkretëtirë. Megjithatë, ndryshe nga shkretëtirat e tjera në Amerikën e Veriut, ajo nuk është shtëpia e kaktusëve spektakolarë.
Nxehtësia ekstreme dhe përmbajtja e lartë e kripës në tokë pengojnë rritjen e shumicës së sukulentëve në Luginë. Megjithatë, disa lule të egra janë përshtatur në një mënyrë të çuditshme me këtë mjedis të ashpër. Këto lule lulëzojnë për një kohë të kufizuar dhe prodhojnë fara të bollshme që mbeten në tokë derisa kushtet të jenë të përshtatshme për mbirjen e tyre.
