Në prill të vitit 2025, një total prej 183 milionë llogarish dhe fjalëkalimesh u zbuluan, sipas Troy Hunt, kreu i bazës së të dhënave Have I Been Pwned (HIBP). Rrjedhja e të dhënave përfshinte gjithashtu fjalëkalimet e përdoruesve të Gmail.
HIBP u lejon përdoruesve të kontrollojnë nëse informacioni i tyre është gjetur në listat e vjedhjeve. Siç shpjegoi Hunt, skedarët përmbanin kryesisht tre lloje të dhënash: adresat e faqeve të internetit, adresat e email-it dhe fjalëkalimet. “Kur dikush hyn në Gmail, adresa e email-it dhe fjalëkalimi regjistrohen në gmail.com, prandaj këto të dhëna janë të disponueshme”, shtoi ai.
Google thekson se rrjedhja lidhet me një aktivitet të gjerë të vjedhjes së informacionit që prek shumë lloje shërbimesh online. Për të mbrojtur përdoruesit e Gmail, kompania rekomandon aktivizimin e autentifikimit me dy faktorë (2FA) dhe përdorimin e çelësave të aksesit në vend të fjalëkalimeve tradicionale.
Si ta kontrolloni llogarinë tuaj!
Për të kontrolluar nëse llogaria juaj është kompromentuar, apo vjedhur, vizitoni faqen haveibeenpwned.com dhe futni adresën tuaj në listën e kërkimit.
Faqja e internetit do të kontrollojë për të parë nëse adresa është shfaqur në listat e postuara nga hakerat.
Nëse zbuloni se jeni sulmuar nga hakerat, duhet të ndërmerrni hapat e mëposhtëm:
*Ndryshoni menjëherë fjalëkalimet tuaja, veçanërisht nëse ato përdoren në platforma të tjera;
*Aktivizoni vërtetimin me dy faktorë (2FA) aty ku është i disponueshëm;
*Shmangni përdorimin e fjalëkalimeve përsëritëse ose të thjeshta, siç janë datat e lindjes ose fjalët e zakonshme;
Kjo rrjedhje informacioni nxjerr në pah edhe një herë se, sa e rëndësishme është të menaxhojmë me vetëdije sigurinë tonë dixhitale në një botë ku të dhënat tona janë objektiv sulmi, çdo ditë.
Përdoruesit që besojnë se llogaria e tyre është kompromentuar këshillohen të identifikohen menjëherë dhe të kontrollojnë aktivitetin e llogarisë së tyre. Google gjithashtu ka një proces rivendosjeje të fjalëkalimit në rastet e vjedhjeve apo hakerimeve të mëdha, si kjo e fundit.
