Kërcënim lufte nga Teherani: “Nëse guxon të godasë, do të shkruhet në histori”.
Kryetari i Parlamentit iranian kërcënon presidentin Donald Trump me sulme ndaj aeroplanmbajtësve dhe konflikt ushtarak të përgjithshëm.
Me një ton nxitës dhe kërcënues, Kryetari i Parlamentit iranian, Mohammad Bagher Qalibaf, lëshoi një paralajmërim të drejtpërdrejtë për Shtetet e Bashkuara dhe personalisht për Trump-in, duke deklaruar se çdo sulm ushtarak ndaj Republikës Islamike do të marrë përgjigje në një mënyrë që “do të mbetet e paharrueshme”.
Duke folur në një tubim pro qeveritar në Teheran, Qalibaf tha se ushtria iraniane është e gatshme të godasë edhe transportuesit amerikanë të avionëve nëse Uashingtoni vazhdon me sulme ushtarake në përgjigje të shtypjes së përgjakshme të protestave antiqeveritare.
Kreu i Parlamentit e paraqiti shtypjen e ashpër brenda vendit jo si një krizë politike, por si një “luftë kundër terroristëve”, duke përqafuar plotësisht retorikën e regjimit.
“Luftë në katër fronte”, sipas Qalibaf, Irani tashmë po përballet me një luftë shumështresore, e cila siç tha ai, po zhvillohet njëkohësisht në katër fusha të ndryshme:
-Luftë ekonomike, përmes sanksioneve dhe izolimit ndërkombëtar;
-Luftë psikologjike, që synon destabilizimin e shoqërisë;
-Luftë ushtarake, kundër SHBA-ve dhe Izraelit;
-Luftë e brendshme, ajo që regjimi e karakterizon si një betejë kundër “elementeve terroriste”.
“Kombi i madh iranian nuk i ka lejuar kurrë armiqtë e tij të arrijnë qëllimet e tyre”, tha ai, duke iu drejtuar një turme që brohoriste slogane të tilla si “Vdekje Izraelit” dhe “Vdekje Amerikës”, duke përforcuar klimën e konfliktit të hapur.
Frika e Uashingtonit: Sulme supersonike dhe transportues avionësh në shënjestër!
Analistët ushtarakë vlerësojnë se në rast të një konflikti të përgjithshëm, Teherani do të përpiqet të godasë thelbin e fuqisë amerikane në Lindjen e Mesme: Grupet e Betejës së Aeroplanmbajtëve.
Në këtë skenar, nuk përjashtohet përdorimi i raketave supersonike ose hipersonike, me shpejtësi Mach 10 deri në 12, të afta për të testuar sistemet e mbrojtjes ajrore të flotës amerikane deri në limit. Një mundësi e tillë konsiderohet nga qarqet ushtarake si makthi më i keq i Shteteve të Bashkuara, menjëherë pas një sulmi të drejtpërdrejtë në tokën amerikane.
Arsenali më i madh i raketave në Lindjen e Mesme.
Irani, sipas vlerësimeve, ka arsenalin më të gjerë dhe shumënivelësh të raketave në Lindjen e Mesme, me aftësi që tashmë janë provuar në praktikë. Përplasjet e fundit me Izraelin dhe veçanërisht e dyta, kanë treguar se dhjetëra raketa iraniane kanë arritur të godasin objektivat me saktësi të jashtëzakonshme, pavarësisht ekzistencës së sistemeve të zhvilluara të mbrojtjes nga raketat.
Edhe më të cënueshme janë bazat amerikane në Irak, Kuvajt, Katar dhe Emiratet e Bashkuara Arabe, të cilat sipas vlerësimeve ushtarake nuk kanë të njëjtin nivel blindimi si Izraeli.
Raketa të të gjitha llojeve dhe rrezeve të veprimit. Arsenali iranian përfshin:
Raketa balistike me rreze të shkurtër veprimi (SRBM), të afta të godasin objektiva deri në 1,000 kilometra, duke përfshirë sisteme të projektuara posaçërisht për të sulmuar anijet dhe radarët.
Raketa balistike me rreze të mesme veprimi (MRBM), me rreze veprimi që arrijnë ose tejkalojnë 2,000 kilometra, të afta të godasin Izraelin, Gadishullin Arabik dhe zonat e Europës Juglindore.
Raketa lundrimi me precizion të lartë dhe me gjurmë të ulët, të projektuara për sulme të thella.
Shqetësuese janë veçanërisht raketat më të reja hipersonike, të tilla si Fattah-1 dhe Fattah-2, të cilat sipas njoftimeve iraniane arrijnë shpejtësi deri në Mach 13, duke e bërë përgjimin e tyre jashtëzakonisht të vështirë.
Mesazhi i Teheranit është i qartë dhe i drejtpërdrejtë për Uashingtonin: Çdo veprim ushtarak nuk do të mbetet pa përgjigje dhe përgjigja, sipas Iranit, do të jetë ajo që do të ndryshojë ekuilibrin e fuqisë në të gjithë Lindjen e Mesme.
