Budapesti e bëri këtë lëvizje gjatë takimit të Ministrave të Jashtëm të BE-së.
Një përçarje e re, serioze, brenda Bashkimit Europian u shkaktua nga Hungaria, pasi bllokoi miratimin e planit për të ofruar garanci të reja ushtarake dhe ndihmë ekonomike për Ukrainën.
Sipas Politico, Budapesti e bëri këtë veprim gjatë një takimi të ambasadorëve të BE-së të premten, duke shkaktuar bujë në Bruksel.
Ky plan specifik parashikonte ofrimin e ndihmës së mëtejshme ushtarake për Kievin, si dhe garancitë formale të sigurisë nga BE. Megjithatë, Hungaria e Viktor Orban mban një qëndrim të vendosur, duke kërkuar një qasje të ndryshme për zgjidhjen e konfliktit.
Ministri i Jashtëm hungarez Peter Szijjarto gjithashtu hodhi poshtë paketën prej 20 miliardë eurosh, duke argumentuar se ajo mund të pengojë negociatat e mundshme të paqes midis Rusisë dhe Shteteve të Bashkuara.
Në një letër drejtuar presidentit të Këshillit Europian Antonio Costa, Orban i kërkoi BE-së të ndjekë shembullin e SHBA-së dhe të punojë drejtpërdrejt me Rusinë për një armëpushim.
Ai tha se ka “ndryshime strategjike” brenda BE-së në lidhje me Ukrainën që “nuk mund të kapërcehen”.
Orbán shprehu gjithashtu kundërshtim të fortë ndaj anëtarësimit të Ukrainës në BE, duke paralajmëruar se kjo do të dëmtonte ekonominë dhe sektorin bujqësor të Hungarisë. Ai deklaroi se pranimi i Ukrainës në rrethanat aktuale ishte “i paimagjinueshëm”.
Por nuk është vetëm Hungaria që duket se po largohet nga linja e përgjithshme e BE-së.
Kryeministri sllovak Robert Fico e ka bërë të qartë se vendi i tij nuk do të vazhdojë mbështetjen ekonomike apo ushtarake për Ukrainën, duke hedhur poshtë plotësisht narrativën e “paqes përmes forcës” të promovuar nga disa vende europiane.
