Lejet e pushimeve të ushtarëve amerikanë që veprojnë në Karaibe, u prenë!
Uashingtoni “pagëzon” Cartel de los Soles si një organizatë terroriste, emëron presidentin e Venezuelës si udhëheqësin e saj dhe u pret lejet e ushtarëve në funksion të një operacioni të mundshëm.
Që nga korriku i kaluar, Departamenti i Thesarit i SHBA-ve e kishte karakterizuar Cartel de los Soles si një organizatë “terroriste globale”. Më 16 nëntor, Departamenti i Shtetit ndërmori hapin tjetër: njohjen institucionale të kartelit si një Organizatë Terroriste e Huaj, me aktivizimin zyrtar të kësaj kategorie disa orë më parë.
Uashingtoni tani më, zyrtarisht emëron Nicolás Maduron si kreun e një rrjeti terrorist me pasoja ndërkombëtare.
Politikisht, tranzicioni është vendimtar. Nga “udhëheqësi autoritar i korruptuar” në “regjimin terrorist”.
Ligjërisht, Shtëpia e Bardhë është hapur ndaj operacioneve speciale që lejojnë madje përdorimin e forcës ushtarake kundër “infrastrukturave terroriste”.
Karaibet në teh të briskut – Operacioni “Shtiza Jugore”
Në muajt e fundit, një skenë presioni intensiv ushtarak është ndërtuar në rajonin më të gjerë. Misioni i aeroplanmbajtëses “Gerald Ford” dhe njësive shoqëruese, ka krijuar praninë më të madhe detare amerikane në Karaibe, që nga Kriza Kubane e Raketave në vitin 1962.
Zyrtarisht, Operacioni “Shtiza Jugore” synon kartelet e drogës. Në praktikë, SHBA-të kanë goditur më shumë se njëzet baza lundruese që klasifikohen si “objektiva droge”, duke shkaktuar me dhjetëra vdekje. Sekretari i Mbrojtjes Pete Hegseth po flet hapur për “opsione të reja” kundër regjimit të Maduros.
CIA operacione në hije dhe sinjale për një sulm të afërt.
Donald Trump ka miratuar një paketë të re operacionesh të CIA-s brenda Venezuelës. Informacionet flasin për një “fazë të re” në ditët në vijim, me skenarë që variojnë nga sabotimi, deri te një përmbysje e mundshme e Maduros.
Në sfond, qarkullon një version edhe më i errët: nëse ka autorizim për vrasjen e synuar të Maduros. Pa konfirmim zyrtar, por me retorikën publike të Uashingtonit që ndryshon kaq dramatikisht, të dhënat tregojnë se vija e kuqe për sulme në objektiva tokësore nuk është më larg.
Pushimet e shkurtuara për operativët.
Sinjali më i prekshëm vjen nga mënyra sesi Pentagoni po i trajton lejet e ushtarakëve. Dita e Falenderimeve (27 nëntor) dhe leja e Krishtlindjeve për forcat që veprojnë në Karaibe po pezullohen, pasi Southcom dëshiron disponueshmëri të plotë për lëvizje të mundshme në territorin e Venezuelës.
Gjenerali Dan Kane është tashmë në zonë, me njoftimin që thotë se ai është në vend për të festuar me personelin ushtarak. Sipas burimeve ushtarake, ai po shqyrton në vend planet për sulme ndaj objektivave ushtarake dhe qeveritare.
FAA e SHBA-ve ka lëshuar paralajmërimin e saj më të qartë, me një NOTAM për hapësirën ajrore të Venezuelës. Rezultati është i menjëhershëm: njëra pas tjetrës, linjat ajrore ndërkombëtare po pezullojnë fluturimet e tyre për në Karakas. Kjo vepron si një bllokadë ajrore de facto e një vendi që tashmë është në asfiksi politike dhe ekonomike.
Uashingtoni ka ndërtuar një kornizë të trefishtë – ligjore, ushtarake dhe ajrore – që tani lejon përdorimin e synuar të forcës kundër regjimit të Maduros. Skenari i një pushtimi të përgjithësuar mbetet i largët. Por skenari i një sulmi “kirurgjikal” në porte, aeroporte ose objekte, që Uashingtoni i lidh me Cartel de los Soles, duket më afër se kurrë.
Sezoni i festave, me leje të pezulluara dhe vendosje të plotë amerikane në Karaibe, vepron si një dritare mundësie. Pyetja nuk është nëse SHBA-të mund ta bëjnë këtë apo jo, por nëse është ky momenti i duhuri?
