“Ne do të marrim vendimet tona” e bën të qartë Benjamin Netaniahu në një kohë kur Perëndimi po bën thirrje të njëpasnjëshme për përmbajtje pas sulmeve nga Irani.
Në veçanti, kryeministri izraelit, i cili u takua me ministrat e jashtëm të Britanisë dhe Gjermanisë dhe i falenderoi për ndihmën e dhënë ndaj Izraelit, tha se vendi i tij do të marrë vendimet e veta për sigurinë.
“Aleatët tanë po bëjnë sugjerime dhe po na japin këshilla të ndryshme, unë e vlerësoj këtë, por dua ta bëj të qartë se ne do të bëjmë gjithçka që është e mundur për të mbrojtur veten”, shtoi ai.
Kreu i shtetit izraelit më herët i bëri thirrje “të gjithë botës” për t’iu kundërvënë kërcënimit që paraqet “regjimi” i Teheranit, gjatë takimeve me ministrat e jashtëm britanik dhe gjerman që pati sot në Jerusalem.
“E gjithë bota duhet të punojë urgjentisht dhe me vendosmëri kundër kërcënimit të paraqitur nga regjimi iranian, i cili kërkon të minojë stabilitetin e të gjithë rajonit”, tha Isaak Herzog për “X”.
Ai tha se kishte një “diskutim shumë të ngrohtë” me David Cameron, por edhe me Analena Burbock, ministrat e parë të jashtëm që vizituan Izraelin që nga sulmi i paprecedent i Iranit ndaj Izraelit fundjavën e kaluar.
Vizita e David Cameron vjen një ditë pasi kryeministri britanik Rishi Sunak i bëri thirrje Izraelit për “qetësi”, duke theksuar se një përshkallëzim nuk do të ishte “në interesin e askujt”.
Analena Berbock, nga ana e saj, foli dje, të martën, në favor të sanksioneve të reja të Bashkimit Europian ndaj dronëve iranianë.
Duke siguruar Izraelin për “solidaritetin e plotë” të Gjermanisë, ai tha gjithashtu se donte të diskutonte me liderët e saj mënyrat për “të shmangur një përshkallëzim të mëtejshëm”.
Duke folur për gazetarët në Izrael sot, Sekretari i Jashtëm britanik, David Cameron, tha se ishte e qartë se Izraeli kishte marrë vendimin për t’iu përgjigjur sulmit me dron dhe raketë të Iranit dhe shpresonte se do të bëhej në një mënyrë që do të minimizonte përshkallëzimin.
“Është e qartë se izraelitët po marrin një vendim për të vepruar” tha Cameron. “Ne shpresojmë që ata ta bëjnë atë në një mënyrë që të bëjë sa më pak të mundshme për ta përshkallëzuar këtë.”
Britania dëshiron të shohë sanksione të koordinuara kundër Iranit, shtoi ai.
“Një mesazh i qartë i pagabueshëm duhet të jepet nga G7” (Grupi i Shtatë vendeve më të zhvilluara të industrializuara), tha ai.
